Atuaqatigiit malittagassaat
Artikel 42: Inuit tamarmik meeqqat pisinnaatitaaffii ilisimassavaat
Atuartitsinermut ilitsersuut
Anguniagaq
- Atuartut atuaqatigiillutik meeqqat pisinnaatitaaffiinut ilisimasat pillugit oqaloqatigiinnissaat.
Piffissaq atugassaq: ullut 1-2
Atortussat
Pappilia qeratasooq, tussit, pappiliamerngit, saqqarmiuusat, nippussuuttakkat, assit, aviisit il.il.
Suliassaq
SULIASSAMUT TUNNGASOQ:
Atuaqatigiiaat tamarmik ukiumoortumik, atuaqatigiit malittarisassaannut taarsiullugit, malittagassaliortassapput, taakkulu atuaqatigiit namminneerlutik nalerisimaarnissaminnut anguniagaannik imaqartussaapput.
Atuaqatigiinnut malitassaliaq Atuarfik Pisinnaatitaaffinnik Tunngavilimmi atuuttussaavoq, tassanimi atuartut akornanni ulluinnarni pisinnaatitaaffinnut erseqqissumik ajornaatsumillu tutsitsisoqarsinnaammat. Anitsiarfimmi aporaattoqarsimappat, toqqissimaneq pillugu oqaloqatigiinnermi, imaluunniit atuartut namminneq sammerusutaqarnerini oqaloqatigiinnermi malitassaliaq sakkussatut atorluarneqarsinnaavoq.
Malitassaliaq atuartunit oqaasertalerneqarlunilu suliaavoq. Inimi atuartitsiviusumi kusanartumik pilersitsinissamut periarfissarpassuaqarpoq.
PERIUSISSAQ:
Atuaqatigiinni atuartut Meeqqat pisinnaatitaaffi pillugit Isumaqatigiissummut artikelinik atuaqatigiinnut tulluarsorisaminnik toqqaassapput. Soorlu Meeqqat Pisinnaatitaaffi Pillugit Isumaqatigiissummi artikel nr. 2: “Naligiissitaaneq assigiinngisitaanissamullu illersorneqarneq”.
Atuartut qupperneranni atuartut artikelit toqqagaat ilanngussaq 4-meersut aammalu Meeqqat pisinnaatitaaffi pillugit Isumaqatigiissummiittut artikelit tamaasa takusinnaavaat. Artikelit immiussaapput tusarnaarneqarsinnaasut allaqqallutillu.
Artikelit toqqakkat atuartut namminneq ulluinnarni oqaatsitik atorlugit allattussavaat. Soorlu allanneqarsinnaavoq: “Tamatta taamaatsilluta ajunngilagut, isikkoq qinngasaarutaassanngilaq, niviarsiaraagaluaraanni nukappiaraagaluaraanniluunniit.”
Atuartut oqaaseqaatit ulluinnarni tigussaasunngortillugit allassavaat. Soorlu: “Kammalaataalluarusuppugut, assigiissutigut assigiinngissutigullu qujamasuutigalugit.”
Atuartut qupperneranni atuartut pisinnaatitaaffiit toqqakkatik namminnerlu oqaasertaliinitik allassinnaavaat. Digitaliusumik immersuereerunik suliatik toqqorsinnaavaat anillatsillugillu.
Katitigassat pingasut takusassiaralugit pilersinneqassapput, malitassiarlu naammassisaq iip atuartitsiviusup iluani nivinngarneqassaaq.
Ukiup atuartitsiffiusup iluani arlaleriarluni atuaqatigiit malitassaliami anguniakkaminnik qanoq ingerlanersut oqaloqatigiissutigissallugit pitsaassaaq.
Ukiut tamaasa malitassialiortoqartassaaq, klasseni alloriarfinni tamani anguniagassaqarlunilu nutaamik kusanartumillu nivinngagassaqartarniassammata.
PISINNAATITAAFFINNIK TOQQAANISSAMUT SIUNNERSUUTIT:
Atuartunut malitassaataatissinni pisinnaatitaaffiit qassit allaqqasuutiginiarnerlugit aalajangiussiuk.
Nukarlerni pisinnaatitaaffiit takusassiat anginerit (Ilanngussaq 4), pisinnaatitaaffiit takutinniarlugitatussallugit, tulluassaaq. Takusassiat ataasiakkaarlugit nassuiaanneqassapput. Uani pingaaruteqarpoq nassuiaatigissallugu pisinnaatitaaffiit aamma allat pisinnaatitaaffiisa ingerlatiinnarnissaannut akisussaaffimmik malitseqarmat.
Atuartut angissusaat apeqqutaatillugit pisinnaatitaaffiit malitassaniittussat isumaqatigiissutaareersunik amerlassusilinnik nappaatitsinikkut, atuartut eqimattakkuutaarlutik pisinnaatitaaffiit takusassiat atorlugit, imaluunniit pisinnaatitaaffinnik allattorsimaffiit aallaavigalugit, toqqaatinneqarsinnaapput.
Aammattaaq pisinnaatitaaffiit atuartut qupperneriniittut atorneqarsinnaapput, atuartullu toqqagaat digitaliusumut allattuivissamut allattuitillugit.
Nappaatitsinermi toqqaatitsinermi: Toqqarneqartut isumaqatigiissutaareersunit amerlaneruppata atuaqatigiit toqqagaareersut akornanni toqqaasinneqaqqissapput.
Eqimattakkuutaartitsilluni toqqaatitsinermi: Eqimattat tamarmik pisinnaatitaaffit assigiit toqqarsimasaat allattarfissuarmut allanneqassapput. Amerlassusaat isumaqatigiissutaasimasumut naapertuuppata atuartut malitassaannut allanneqassapput, taamaanngippat atuaqatigiit ataatsimoorlutik pisinnaatitaaffinnik piiaanngikkunik ilaartuitinneqassallutik.
Pisinnaatitaaffinnik toqqaatitsiniarnermi inuit ataasiakkaat nalerisimaarnissaannut pingaaruteqartut oqallisiginissaat pingaaruteqarpoq – taamatuttaaq aamma atuaqatigiit nalerisimaarnissaat. Taamaammat toqqaasitsiniarneq malitassaliornermi pingaaruteqartorujussuuvoq.
PILERSITSINIARNERMI SAMMISASSAT
Atuartut pisinnaatitaaffiit malitassaataatiminnut toqqakkatik tamaasa takutinniarlugit titartarsinnaapput, imaluunniit atuagassianit aviisinillu assiliaaqqat qiortaariarlutikt nippussuussinnaallutik.
Atuartut pisinnaatitaaffiit toqqakkatik takutinniarlugit naatsunik isiginnaagassiorsinnaapput. Taamaalilluni pisinnaatitaafiit toqqakkatik tigussaasunngortillugit paasinartunngortissavaat.
Sammisat tamakku atuaqatigiit malitassaatiminnut pisinnaatitaaffinnik sorlernik toqqaasitsiniarnerini aamma atorluarneqarsinnaapput.
