PINNGUARNISSAMUT PISINNAATITAAFFIK

• Meeqqat tamarmik sunniuteqaqataasinnaanerminnik paasisaqarnissaat.
• Meeqqat tamarmik sooq nammineq pinnguarnerup pingaaruteqarnera pillugu  oqaasertaliisinnaalernissaat.
• Meeqqat tamarmik suna pinnguarineqassanersoq aaliangiiffigeqanissaminnik paasisaqarnissaat. 

Atortut ataatsimoorluni pinnguaammut atugassat.

Atuartut paasiniaasartuusaarnerminni assiliineq atorluarsinnaavaat.

Atuartut angajaqqaaminnik aanakkuminnilluunniit qanga pinnguartariaatsit pillugit oqaloqatiginninnerminni eqqaamasassanut allattuiffik akissutinut atorluarsinnaavaat. Allattuiffik immersorneqareerpat akissutit qarasaasiamut toqqorneqarsinnaapput. 

PERIUSISSAQ – PINNGUAAT

Ataatsimut eqqartueqatigiinneq

Inersimasoq pinnguaat pillugu nassuiaassaaq, pinnguaallu saqqummiunneqartoq suussanersoq inersimasup nammineerluni aaliangissavaa.

Inersimasup pinnguaat pikkunaassinnaasoq, meeqqallu amerlasuut eqiagisinnaasaat, piareersariikkani ilisaritissavaa.

Minutsit tallimat ingerlareerpata pinnguaat unitsinneqassaaq, inersimasullu atuartut oqarfigissavai minutsit tallimat ingerlaneranni aaliangersinnaagaat suna pinnguaatigerusunnerlugu – piumaffigineqassappullu kikkut tamarmik pinnguaatigerusutaannik, namminnerlu ilitsersuussutigisinnaasaminnik, pinnguaammik allamik nassaassasut. Atuartut namminneerlutik qulakkiissavaat tamarmiullutik pinnguaat paasissallugu, tamarmillu assigiimmik peqataanissaminnut ajugaasinnaanissaminnullu periarfissaqassallutik. 

Pinnguaat nutaat minutsini qulini ingerlanneqassaaq. 

Atuartut namminneq pinnguaatigisamut aaliangeeqataanerminnut suna assigiinngissutigineraat ataatsimut eqqartorneqassaaq.

PERIUSISSAQ – PAASINIAASARTUUSAARNEQ

Atuartut anitsiarnerminni pinnguaatinik nutaanik ujartuissapput. Atuarfimmi atuartut allat pinnguaatigisaat isiginnaassavaat. Pitsaassaaq atuartut kajumissaassallugit pinnguaatinik paasiniaanerminni malittarisassanik paasiniaanissaannik. 

Atuartut assiliinissaminnut periarfissaqarunik aamma iluaqutaasinnaavoq.

Isaagunik atuartut takusimasaminnik oqaluttuassapput. Kingorna pinnguaatit misilittarneqarsinnaapput, atuartulluunniit anitsiarfimmi misilittaaqquneqarsinnaapput.

Atuartut isiginnaagaat aallaavigalugit pinnguarnerup pinngortarnera, kikkullu qanoq pinnguarineqarsinnaaneranik aaliangiisarnersut, eqqartorneqarsinnaalluarpoq.

PERIUSISSAQ – QANGA PINNGUAATIT

Qanga pisimasut imaluunniit angajoqqaat meeraagallaramik misigisaminnit oqaluttuaat tusassallugit nuannertuaannarpoq.

Uani suliassami atuartut angajoqqaaminnik, aanakkuminnik allanilluunniit qanga qarasaasiaqaranilu iPadeqaranilu smartphoneqanngikkallarmat atuartuunikuusimasunik oqaloqateqarnissaannik kajumissaarneqassapput.

Atuartut paasiniassavaat suut atuarfimmi sunngiffimmilu pinnguaatigineqartarsimanersut.

Klassiminnut uterunik atuartut paasisaminnik oqaluttuassapput. Kingorna pinnguaatit misilissinnaavasi atuartulluunniit anitsiarfimmi misilittaaqquneqarsinnaapput.

Atuartut paasisaat aallaavigalugit pinnguaatit pinngortarneri, pinnguariaatsinut kikkut aaliangiisarneri, eqqartorneqarsinnaalluarpoq.

Qularnanngitsimik pinnguaatit ilisarineqarlutillu pinnguaatit nutaat eqqaaneqaqqissapput.

Pinnguarluarisi.